5-6 апрель көннәрендә Казан шәһәрендә милиция подполковнигы, самбо көрәше һәм дзюдо буенча СССРның спорт остасы Рәшит Садыков истәлегенә багышланган Идел буе шәһәрләренең дзюдо буенча IXнчы Республика турниры булып  үтте.
"Динамо" стадионы спорт залында узган бу ярышларда Татарстан районнарыннан һәм Пенза, Чувашия, Мари Эл, Саратов шәһәрләреннән 300гә якын яшь спортчы катнашты. Алар арасында Шәмәрдән "Яшьлек" яшьләр үзәгендә шөгыльләнүче дзюдочылар да көч сынашты һәм призлы урыннарга да  ирештеләр. 28 кг үлчәү категориясендә Булат Шәйдуллин 1нче урынны яулады. 32 кг авырлыкта исә Рашат Искәндәров 2нче урынга  ия булды.  34 кг  авырлыкта  Ришат Нигматуллин  да уңышлы чыгыш ясады. Егетләр Татарстан Республикасының атказанган тренеры Мөдәррис Галимуллин кул астында шөгыльләнәләр.