Спорт бәйрәмен оештыручы Саба районы мәгариф бүлеге һәм аның каршында эшләп килүче балалар һәм яшьүсмерләрне физик яктан хәзерләү клубы җитәкчелеге: "Бәйгене саф һавада уздыруны максат итеп куйдык, аның организмга һәм кешенең үзенә тәэсир көче югары" - диләр. Бу юлы эстафета ярышлары бераз үзенчәлеклерәк булды. Узышта катнашучылар 2 төркемгә - кызлы гаиләләргә һәм уллы гаиләләргә бүленеп 3 чакрым дистанциядә көч сынашты. Эстафетаны иң элек әтиләр башлап җибәрде. Алардан соң узышны әниләр дәвам итте. Ә ярышны төгәлләү балаларга, ягъни улларына һәм кызларына йөкләнде. Узышларда зона турларында җиңеп чыккан 6 гаилә катнашты. Уллы гаиләләр арасында 1 нче урынны Лесхоздан Миннехановлар, 2 нче урынны Сабадан Миннегуловлар, 3 нче урынны Шәмәрдәннән Галимуллиннар алды. Кызлы гаиләләр арасында 1 нче урынга Эзмәдән Әхәтовлар, 2нчегә Икшермәдән Шәрифуллиннар, 3нче урынга Сабадан Шәйдуллиннар ия булды.  Аларга район мәгариф бүлеге җитәкчесе Ш.Зиннуров мактау грамоталары, акчалата премияләр  тапшырды. Хатын-кызларга бәйрәм атрибуты - чәчәк бәйләмнәре  бүләк  ителде.